ويطلع عين أم إللي تحبك تاني

لو سألت نفسي ليه عندي الرغبة الملحة دي إني اتكلم معاك وأعرفك مش بلاقي إجابة واضحة...احساسي ناحيتك مش الاحساس إللي لا يقاوم

ولا انت الواد الجن العفريت إللي مافيش منه اتنين

ولا الوقت ولا طبيعة علاقتنا تسمح بالهلاوس إللي في مخي دي

يمكن يكون ده السبب؟

يمكن عند

يمكن متضايقة لدرجة انى ....

وكالعادة مش هاترد

كالعادة هابطل أكلمك ليوم..يومين..كتير

ويمكن أنسى إني أعرفك

عارفة إني يمكن أكون ماباجيش على بالك غير لما بكلمك ويمكن ده مابيفرقش معاك

عارفة إنك انت كمان ولأوقات كتير مش بتشغل من عقلي غير الكاش ميموري الفترة إللي بكلمك فيها

يمكن بستفز بيك حتت فى عقلي ماينفعش أوصل لها من غيرك

انت مضايقنى

مش عارفة انت خايف مني ليه؟

انت بجد واجعني ..واجع عقلي

أكتب ليه أصلاً وأنا عارفة إنك مش هاترد ؟ ويمكن كمان متقراش

انا بس محتاجة أفهم...انا بحس بوجودك لدرجة مستفزة ومش منطقية
يعنى دلوقت كنت واثقة إنك اونلاين..احساسى قاللي كدة

بحس بدرجة حرارة الكلام إللي بتبعتهولي كل فين وفين

اوووووفففففففففف

انا بكعبل نفسي كدة ليه؟

مش قادرة أصدق الوش الخشب إللي انت مصدرهولي معظم الوقت ده

مش حقيقى

مش قادرة أشوف منك غير الوش إللي لمسته مرات قليلة

انا حقيقي محتاجة أعرف انت بتتصرف كدة ليه؟

هو أنا بضايقك؟

يا أخي احترم عقلي ورد على أسئلتي مرة

أنا مش عايزة غير إجابات

موقف واحد واضح

مش شايفة إن ده كتير

ما علينا

واضح إني هافضل أكلم نفسي

بس برضو مش قادرة أكدب احساسي

I'M SO PISSED OFF

يطلع عين أم إللي تحبك تاني ..

ملحوظة : النوت دي هي جزء من دردشة الكترونية لإحدى الكائنات إللي آخرهم تاء مربوطة